گرنگی ئاسیای وزەی نوێبووەوە بۆ چارەسەری ژینگەیی چییە؟
کۆمپانیای ئاسیایی وزەی نوێبووەوە (ئاسیا تاقە) چارەسەری پاشماوەی ماڵ و شوێنی نیشتەجێبوونەکان لە شاری سلێمانی دەکات، هەروەها پاشماوەی چالاکیی فەرمانگە و دامەزراوە گشتییەکان و چالاکییە بازرگانی و پیشەسازییەکان و شەقام و هتد. چارەسەرەکە، ماددە مەترسیدارەکانی وەک پاشماوەی پزیشکی یان کیمیایی ناگرێتەوە، هەروەها پاشماوەو خاشاکی چالاکییە جۆراوجۆرەکانی بیناسازی.

گرفتی مامەڵەکردن لەگەڵ پاشماوەی ڕەقی شارەوانییەکان – شاری سلێمانی وەک نمونە.
پرسی چارەسەرکردنی پاشماوە لە شاری سلێمانی، وەک هەموو شارەکانی عێراق، ساڵانێکە بوەتە کێشەیەکی جددی و ئاڵۆز و مەترسیدار لەسەر ژینگەو ئایندەی شارەکەو تەندروستی هاوڵاتیانی ڕووبەڕووی مەترسی کردۆتەوە. ماوەی دەیان ساڵە پاشماوەی ڕەق لە شارەکە کۆ دەکرێتەوەو بەشێوەیەکی هەڕەمەکی و بەبێ ڕەچاوکردنی ڕێکاری گونجاو لە ناوچەی تانجەرۆ فڕێدەدرێت کە بە مەودایەکی کەم لە ناوەندی شار و دەوروبەری ناوچە نیشتەجێبوونەکانەوە دوورە. ئەمەش دەبێتە هۆی پیسبوونی خاک و ئاوی سەرزەوی و ژێرزەوی و تێکچوونی ئیکۆسیستمی توخمە سروشتییەکانی دیکە. جگە لەوەش ئەگەری ئاگرکەوتنەوە لە پاشماوەکان کە دەخرێنە ژێر خاکەوە، هەمیشە زۆرەو غازی زیانبەخش و ژەهراوی لە هەوادا بڵاو دەکاتەوەو مەترسی ڕاستەوخۆ لەسەر تەندروستی دانیشتوانی دەوروبەری تانجەرۆ دروست دەکات، بەتایبەتی لەگەڵ فراوانبوونی شارو بنیاتنانی ناوچەی نیشتەجێبوونی نوێ و بینای پیشەسازی لە نزیک ناوچەی زبڵدانی ئاماژە بۆکراو.

تێڕوانینێکی گشتی بۆ وێستگەکانی چارەسەری پاشماوەی ڕەق و بەرهەمهێنانی سووتەمەنی جێگرەوە لە سلێمانی
سووتەمەنی وەرگیراو لە پاشماوەRDF  لە کارگەکانی چیمەنتۆو وێستگەکانی بەرهەمهێنانی کارەباو پیشەسازییەکانی دیکەدا وەک جێگرەوەی سووتەمەنی باو (نەوت، گاز، خەڵووز) بەکاردەهێنرێت. ئەو شێوازەی کۆمپانیای (ئاسیا تاقە) هەڵیبژاردوە بۆ چارەسەرکردنی پاشماوە، بە یەکێک لە باشترین و کاریگەرترین شێوازەکان دادەنرێت لەو بوارەدا.

کارگەکە دەکەوێتە ناوچەی تانجەرۆ لە شاری سلێمانی، مانگی ئایاری ساڵی (٢٠٢٠) دروستکراوەو، لەمانگی ئابی هەمان ساڵدا بەسەرکەوتوویی کەوتووەتە کار. ئامانجی کارگەکە چارەسەرکردنی ٤٠٠ هەزار تەن پاشماوەیە لە سالێکداو هەزارو ١٠٠ تەن لە ڕۆژێکدا کە بڕی پاشماوەی ئێستای شاری سلێمانییە. پاشماوەکان بڕی (55%) شێیان تێدایەو شیاون بۆ گۆڕینیان بۆ سوتەمەنی بەرهەمهێنراو لە پاشماوە، لەلایەن کارگەکانی چیمەنتۆش لە شاری سلێمانی پەسەندکراوە.
کارگەکە بەشێوەیەک دیزاین کراوە کە ٥٠٠ هەزار تەن پاشماوە لە ساڵێکدا چارەسەربکات، تا جێگەی زیادبوونی چاوەڕوانکراوی بڕی پاشماوەکان بکاتەوە بەهۆی زیادبوونی ژمارەی دانیشتوانەوە. چەندین ئامانجی سەرەکی لە پێوەرەکانی دیزاینی کارگەکەدا لەبەرچاو گیراوە.

• • دەستەبەرکردنی چارەسەرێکی نمونەیی بۆ گرتنەخۆی چارەسەری هەموو پاشماوە ڕەقەکان لە شارەکەدا و ناردنی کەمترین بەرهەمی پاشماوەی لاوەکی بۆ زبڵخانە (لاندفیل)ی تەندروستی بە بڕی کەمتر لە ١٥٪ی پاشماوەی  وەرگیراو.
  • توانای فراوانبوونی کارگە بۆ چارەسەرکردنی جۆرەکانی دیکەی پاشماوەی وەک پاشماوەی کۆن کە لە ناوچەی زبڵدانەکە فڕێدراون کە سەر بە شارەوانییە.
  • بەرهەمهێنانی زۆرترین بڕی سووتەمەنی وەرگیراو لە پاشماوە (RDF).
• • پاراستنی ناوچەکە لەڕێگەی کەمکردنەوەی بڕی ئەو ماددانەی کە دەبێ فڕێ بدرێن بۆ (≤15%)ی کۆی پاشماوەی وەرگیراو، ئەمەش دەبێتە هۆی گەڕاندنەوەی (6.5)ی ڕووبەری ناوچەکە
• • کەمکردنەوی مەترسییە ژینگەییەکان لەسەر ناوچە شارستانییەکان و خاک و ئاوی ژێر زەوی و سەر زەوی و توخمە سروشتییەکانی دیکە، سەرباری ڕێگرتن لە مەترسی ئاگرکەوتنەوە لە ناوچەکانی ژێرخاکنانی زبڵدان دەرکردنی غازی ژەهراوی زیانبەخشی پەیوەست بەوە.
• • کەمکردنەوی مەترسییە ژینگەییەکان لەسەر ناوچە شارستانییەکان و خاک و ئاوی ژێر زەوی و سەر زەوی و توخمە سروشتییەکانی دیکە، سەرباری ڕێگرتن لە مەترسی ئاگرکەوتنەوە لە ناوچەکانی ژێرخاکنانی زبڵدان و دەرکردنی غازی ژەهراوی زیانبەخشی پەیوەست بەوە.